சொல்லப் படாத உண்மைகள் ............சொல்லப் பட்ட விதம்....??????.

அண்ணல் நபியின் அருமைப் பெற்றோர் அப்துல்லாஹ் ஆமினா - சொல்லப் படாத உண்மைகள் ............சொல்லப் பட்ட விதம்....??????.

அனைத்துப் புகழும் அல்லாஹ்வுக்கே...!அல்ஹம்து லில்லாஹ்.

நண்பர் அன்புராஜை நன்றியுடன் நினைத்துப் பார்க்கும் நேரம் இது.

நண்பர் அரபுத் தமிழன் அலட்சியமாக கீறி அனுப்பிய ஒரு பின்னூட்டத்தின் இன்னொரு  வெற்றிப் பதிவு இது.

நண்பர் அன்புராஜ் சுட்டிக் காட்டிய இஸ்லாத்துக்கு எதிரான கருத்துக்களை தாங்கி நின்ற இணையப் பதிவுகளின் கோரத் தாண்டவத்தைக் கண்டு அஹ்லுல்பைத் ஆதரவாள நண்பர்களான முனவ்வர், ஹசன், மௌலவி ஜிப்ரி , ரிஸ்வான் ஆகியோரது பதை பதைத்த பறி தவிப்புகளின் வெளிப் பாடு  நமது ஏனைய நண்பர்களைத் தொற்றிக் கொள்ள மெது மெதுவாக ரூமி, இம்ராஸ்,ரியாஸ், Faique, நவுசர், ரிஸ்வி, மஹ்தி,ஹைதர் அலி, ஹுசைன் பாரூக் , தினேஷ் , டைடஸ் ஆகியோரை ஒரு நேர் கோட்டில் கொண்டு வந்து நிறுத்தியது.

பல்வேறு தளங்களில் முக்கியப் பொறுப்புக்களில் இருந்த இந்த நண்பர்களின் அதிசயமான ஒன்றிணைப்பில் ஆச்சரியப் பட்டு மகிழ்வு கொண்ட மௌலவி யஹ்யாவும், மௌலவி மபாஹிமும், இவர்களுடன் இணைந்துக் கொள்ள விடயம் சூடு பிடிக்க ஆரம்பித்தது.

"அண்ணல்  நபியின் அருமைப் பெற்றோர் அப்துல்லாஹ் ஆமினா நரகவாதிகளா?" நூல்  மெலிதாக நூலுருப் பெறத் துவங்கியது.

"அபூதாலிப் நரகவாதியா?" நூலைப் போலவே இதனையும் இஸ்லாமிய மார்க்க அறிஞர்களிடையே மாத்திரம் விநியோகிப்போம் என்று முதலில் நாம் நினைத்தோம்.

எமது இந்தத் தீர்மானத்திற்கு நண்பர் முனவ்வர் தனது கடுமையான ஆட்சேபனையைத் தெரிவித்தார்.

அவருடன் நண்பர் ஹைதர் அலியும் சேர்ந்துக் கொண்டார்.

இனி புத்தக வெளியீட்டு நிகழ்வு புதுப் பொலிவுடன் புதுமையான நகர்வை நோக்கி திட்டமிடப் பட்டது. 

இந்தப் புத்தகத்தை மக்கள் மயப் படுத்துவதில் நாம் ஒரு புதுமையைக் கைக் கொள்ள வேண்டும் என்று எல்லோரும் விரும்பினோம். 


எப்படி என்பதில் பலத்த வாத விவாதங்கள் நடை பெற்று இறுதியில் அரசியல் வாதிகள்,வியாபாரிகள்,கல்விமான்கள், சாதாரண பொது மக்கள் என்று சகல தரப்பினரையும் உள் வாங்கிய நிலையில் இந்த புத்தக வெளியீடு அமைய வேண்டும் என்று அனைவரும் முடிவு செய்தோம்.


மே மாதம் 27 ஆம் திகதி நூல் வெளியீடு திகதியிடப் பட்டது. 

அழைக்கும் அனைத்து விருந்தினர்களுக்கும் உணவு வழங்கி கௌரவிக்க வேண்டும் என்று நண்பர் ரூமி கருத்துரைக்க சிலரின் விருப்பமின்மைக்குப் பின்னர் அவரின் முடிவு ஏற்றுக் கொள்ளப் பட்டது.  

மௌலவி ஜிப்ரி இன்னுமொரு புரட்சிகரமான பிரேரணையை முன்வைத்தார்.


அதன் படி வருகைத் தரும் அனைத்து விருந்தினருக்கும் வழங்கப் படும் நூல் பிரதிகளுக்கு எந்த விதமான பணமோ நன்கொடையோ ஏற்றுக் கொள்ளப் படக் கூடாது என்பதாக அவரது ஆலோசனை அமைந்தது. 

பணம் பெற்றுக் கொள்ளாமல் நூலை இலவசமாக வழங்கினால். எம்மைப் பற்றி மக்கள் தவறாக கருதிக் கொள்வார்கள் என்று எம்மிடையே இருந்த சில புத்தி ஜீவிகள் கருத்து தெரிவித்து அவரது கருத்தை மிகக் கடுமையாக எதிர்த்தார்கள்.


எம்மிடையே மிகச் சாதாரணமானவர்கள் என்று கருதிய சில நண்பர்கள் மௌலவி ஜிப்ரியின் ஆலோசனைக்கு ஆதரவு தெரிவிக்க அவரது முடிவு ஏற்றுக் கொள்ளப் பட்டது.


திடீரென நமது நண்பர்களில் ஒருவர் எங்களது குழுவினர்கள் அனைவரும் ஒரேவிதமான சீருடை அணிந்து இருந்தால் நல்லது என்று கருத்துரைக்க எங்களது குழுவில் இருந்த சட்டத்தரணி ஒருவருக்கு இருப்புக் கொள்ளவில்லை. 

உடனே அவர் பதட்டத்துடன் சீருடை ஆலோசனையை எதிர்க்கத் துவங்கினார்.


கோட், சூட் அணியும் தகுதி சட்டத் தரணிகளுக்கு மட்டுமே மட்டுப் படுத்தப் பட்டிருப்பதாக கருதி அவர் தன்னையே ஏமாற்றிக் கொண்ட செய்தி   அவரின் அவசரமான அந்த பதட்டமான எதிர்ப்பின் உள்ளே ஒளிந்திருந்த அவலம்   பிறகு புரிந்துப் போனது.


அப்படியே மெது மெதுவாக 27 ஆம் திகதி ஞாயிறு மெலிதான தூறல் மழையுடன் விடிந்தது.


நமது நண்பர்கள் குலாம் இரவில் நிம்மதியாக உறங்கி இருக்க மாட்டார்கள் என்பதை  குறிப்பிட்ட நேரத்துக்கு முன்னரேயே மண்டபத்துக்கு வருகை தந்த அவர்களது செய்கை உணர்த்திக் காட்டியது.


ஒரே நிறத்திலான சீரான சீருடையுடன் கோட், சூட், டை என்று அட்டகாசமாக விறைப்புடன் நண்பர்கள் இருந்த தோரணை அந்த மண்டபத்தைக் கொஞ்சம் திமிராகக் காட்டியது.  

வழக்கமான புத்தக வெளியீட்டு வைபவம் போலவே பத்து நிமிடம் தாமதித்தே விழா ஆரம்பமாகியது.


விழா தொகுப்பை பிரபல வானொலி தொலைகாட்சி அறிவிப்பாளர் இஸ்மாயில் B.மஆரிப்  தனது கம்பீரமான தொனியில் தொகுத்து வழங்கினார்.


நண்பர் ஹைதர் அலி கூட்டத்தைத் தலைமைத் தாங்கினார்.

வரவேற்புரையை ஹைதர் அலியே நிகழ்த்தினார்.

விருந்தினர்கள் மெது மெதுவாக வரத் துவங்கினர்.


பிரதம அதிதிகளும் ஒருவர் பின் ஒருவராக வரத் துவங்கினர்.


சீருடை அணிந்த எங்களது நண்பர்கள் அமைதியாக விறைப்புடன் தத் தமது பொறுப்பில் விடப்பட்ட அலுவல்களை மிகவும் சிரத்தையுடன் முடுக்கி விடப் பட்ட இயந்திரம் போல் செய்துக் கொண்டிருந்தார்கள்.




விழா களைக்கட்டத் துவங்கியது.


விருந்தினர்கள் அமைதியுடன் நடக்கும் நடப்புக்களை அவதானித்து பேச்சாளர்களின் உரையில் தம்மை மறந்து அமர்ந்திருந்தார்கள்.


மௌலவி பர்ஸான் அஹ்ளுல்பைத்களின் முக்கியத்துவத்தைப் பற்றிப் பிரமாதமாக பேசினார்.


மௌலவி யஹ்யா துணிச்சலுடன் உமையாக்களின் அராஜக அரசியலை விறைப்பாக  தனது உரையில் துகிளுரித்தார்.


காத்தான்குடி பௌஸ் நூலைப் பற்றிய நயவுரையை,விமர்சன உரையாக நகைச் சுவை இழையோட நிகழ்த்தி முடித்தார்.


ஒன்றன் பின் ஒன்றாக நிகழ்ச்சிகள் விறு விறுப்பாக நிகழ்ந்து நகர்ந்துக் கொண்டிருந்தன. 


நூல் வெளியீடும் அமர்க்களமாக வெளியிட்டு வைக்கப் பட்டது.

நன்கொடை வழங்கவேண்டும் என்று வந்த விருந்தினர்கள் எந்த விதமான நன்கொடையும் ஏற்றுக் கொள்ளப் படமாட்டாது என்ற செய்தியைக் கேட்டு கொஞ்சம் திகைத்துப் போனார்கள்.

பணமோ அல்லது  எந்த விதமான நன்கோடைகளோ ஏற்றுக் கொள்ளாமல் - நூலை வாசித்து அது கூறும் உண்மைகளை அறிந்துக் கொள்ள வேண்டும் என்பதே எங்களது இலக்கு என்ற கூற்றுக்கு அங்கே சமூகம் அளித்திருந்த மக்களிடையே பலத்த வரவேற்புக் கிடைத்தது. 


ஒரு பிரபல எழுத்தாளர் இப்படி சொன்னார்."நாம் நிறைய நூல் வெளியீட்டு நிகழ்ச்சிகளுக்கு சென்றிருக்கிறோம்.அங்கெல்லாம் பணத்தைக் கொடுத்துத் தான் நூலை வாங்குவோம். ஆனால், அந்த நூலை முழுவதுமாக வாசிக்க மாட்டோம். ஆனால்,  இந்த நூலை நாம் விலைக் கொடுத்து வாங்கவில்லை.என்றாலும், இந்த நூலை முழுவதுமாக நிச்சயம் வாசிப்போம்"


ஆரோக்கியமான விமர்சனமாக அவரது கூற்று அமைந்தது. (ஒரு பானை சோறுக்கு ஒரு மணி பதரல்லவா?)


எந்த விதமான அயர்வும் இல்லாமல் நிகழ்ச்சிகள் நிறைவு பெற அனைவரும் திருப்தியுடன் கலைந்துச் சென்ற காட்சி மனதுக்கு இதமாக இருந்தது.


விழா ஆரம்பித்து பதின் ஐந்து நிமிடத்துக்குள் மண்டபம் மக்கள் வெள்ளத்தினால் நிறைந்து விட்ட செய்கை  ஆச்சரியமான செய்தியாக அன்று அந்த மண்டபத்தில் பதிவாகிய விடயத்தை கூட்டம் முடிந்ததன் பின்னர் அந்த மண்டபத்தின் நிர்வாகி பெருமையுடன் சொன்னார்.

நபிகளாரின் பெற்றோர் சம்பந்தமான சொல்லப் படாத உண்மைகள் சொல்லப் பட்ட விதம் கொஞ்சம் வித்தியாசமாக அந்த மண்டபத்தில் ஒலித்தது என்னவோ உண்மைதான்.

ஒரு விடயம் அன்று நிதர்சனமாக புரிந்துப் போனது.


மிகவும் வெற்றிகரமாக நடந்து முடிந்த அந்த நிகழ்வு ஒரு முடிவல்ல. 


முடிவில் தொடங்கிய அழகான ஆரம்பம்................!!!